Бердәмлекнең көче

«Татнефть-Добыча» структур подразделениесе яңадан торгызылган традиция – Мастерлар слеты кысаларында чаралар үткәрүен дәвам итә. Бу вакыйга һөнәр буенча иң яхшыларны хөрмәтләү өчен генә түгел, ә аралашу, тәҗрибә уртаклашу һәм актуаль мәсьәләләр буенча фикер алышу өчен дә уникаль мөмкинлек булып тора. Ноябрьдә кызыклы чаралар берьюлы ике идарәдә – «Әлмәтнефть» һәм «Елховнефть»тә узды.

«Әлмәтнефть»тә Мастерлар слеты

Чара тәҗрибәле белгечләрне һәм һөнәри эшчәнлеген яңа гына башлаган яшь хезмәткәрләрне берләштергән мөһим вакыйгага әверелде. Чараны ачып, идарә начальнигы Илфат Нурсәетов мастер һөнәренең мөһимлеген һәм эшчәнлекнең ышанычлылыгын һәм тотрыклылыгын тәэмин итүдә төп ролен ассызыклады.

– Мастер вазифасы һәрвакыт кирәкле һәм мөһим. Сезнең иңнәрдә производство процесслары өчен генә түгел, ә сезнең кул астында эшләүче кешеләр өчен дә зур җаваплылык ята. Сез – көн саен иң мөһим процессларның алгы сызыгында торучылар, – диде ул.

Ул шулай ук белгечләрнең яңа буынын үстерү өчен нигез булдырып, белемнәре һәм тәҗрибәләре белән уртаклашуларын дәвам иткән тәҗрибәле мастерларга рәхмәтен белдерде. Һөнәри осталык һәм хезмәтеңә тугрылыкның мондый мисаллары эшкә рухландыра һәм корпоратив традицияләрне ныгыта.

Чараның төп өлеше тантаналардан торды. Катнашучылар хезмәт юлын яңа гына башлаган мастерларны котладылар һәм иң яхшыларны хөрмәтләделәр. Бу аларның эшенең әһәмиятен һәм уртак эшкә керткән өлешләрен ассызыклау өчен менә дигән мөмкинлек булды.

Моннан тыш, слет тәҗрибә уртаклашу мәйданчыгына да әйләнде. Җанлы аралашу форматында мастерлар үзләренең эшне оештырудагы табышлары белән уртаклаштылар, эш барышында очрый торган хәлләр турында фикер алыштылар һәм производство процессларының нәтиҗәлелеген арттыру буенча чишелешләр тәкъдим иттеләр. Яшь белгечләр тәҗрибәле хезмәттәшләре киңәшләреннән илһам алып, һөнәргә үз карашларын формалаштырдылар.

Команда рухы барлыкка китерүче активлыклар чараның мөһим өлешенә әверелде. «Тигез диалог» форматы катнашучыларга ачылырга, кискен мәсьәләләр турында фикер алышырга һәм яңа идеяләр тәкъдим итәргә мөмкинлек бирде. Фокус-төркемнәрдә уртак эш һәркемгә үзен уңыш һәркайсының керткән өлешенә бәйле булган, бердәм команданың бер өлеше итеп тоярга ярдәм итте.

Чара бәйрәм табыны артында концерт программасы карап хозурлану белән тәмамланды. Катнашучылар формаль булмаган шартларда рәхәтләнеп аралаша, бай эчтәлекле көнгә йомгак ясый, тәэсирләре белән уртаклаша һәм, гомумән, бәйрәм рухы белән ләззәтләнә алдылар. Чарада шулай ук Илнур Зариповны һәм Ринат Шакировны 2024 елда уллары туу уңаеннан кайнар котладылар. Моннан тыш, Ринат Шакировның юбилее да булган икән. Хезмәттәшләре һәм дуслары аны 30 яше белән ихлас котладылар, сәламәтлек, бәхет һәм киләчәктә дә һөнәр юлында уңышларга ирешүен теләделәр.

«Елховнефть»тә Мастерлар слеты

22 ноябрьдә «Солнечный» ял базасында «Елховнефть» нефть-газ чыгару идарәсенең Мастер көне узды. Чара идарә начальнигы Вадим Гыйләҗев сәламләү сүзе белән башланып китте. Ул компаниянең уңышка ирешүе өчен мастер һөнәренең мөһимлеген билгеләп кенә калмады, үзенең хатирәләре белән дә уртаклашты.

– 20 елдан артык элек шушы ук залда мине мастерлыкка багышлаганнарын бик яхшы хәтерлим әле мин. Бу минем өчен бик дулкынландыргыч һәм әһәмиятле вакыйга булды. Салынган традицияләрне дәвам итеп, бүген без шушы чараны уздыру өчен җыелдык. «Елховнефть» нефть-газ чыгару идарәсе киләчәк фаразларына һәм Компаниянең стратегик бурычларына нигезләнеп, үз алдына һәрвакыт төгәл максатлар куя. Монда сезнең – мастерларның да өлеше зур. Җаваплылык күп тапкырлар артты, ләкин сез чын команда эшен күрсәтәсез, мин сезгә чын күңелдән рәхмәтлемен, – диде ул.

Чара «Татнефть-Добыча» структур подразделениесе җитәкчеләренең чыгышлары белән дәвам итте. Производство процессларын озата бару идарәсе начальнигы Илсур Нуретдинов һәм Елхов-Кама буе һәм Баулы территориясен эшкәртү бүлеге начальнигы Таһир Туктаров Компания эшчәнлегенең төп юнәлешләре турында актуаль мәгълүмат белән уртаклаштылар. Алар нефть чыгару һәм эшкәртү блогында яңа технологияләр кертү, ятмаларны нәтиҗәле эшкәртү алымнарын үстерү, база күләме буенча планнар һәм производство чыгымнарын кыскарту чаралары турында җентекләп сөйләделәр.

Идарә мастерлары фикер алышуга актив кушылдылар. Үз тәҗрибәләре белән уртаклаштылар, подразделениеләрдә эшне оештыруга якын килү юллары һәм сервис предприятиеләре белән үзара хезмәттәшлек итү турында сөйләделәр, шулай ук производство процессларының нәтиҗәлелеген арттыру буенча идеяләрен тәкъдим иттеләр.

Сигез яңа хезмәткәрне мастерлыкка багышлау көннең үзәк өлеше булды. Аларга һөнәр символлары – «алтын» каергы ачкыч һәм каска тапшырылды, алар нефтьченең җаваплылыгын һәм эшкә тугрылыгын символлаштыралар. Тантаналы мизгел яшь белгечләрнең һөнәри тормышында мөһим этап булып торачак.

Рәсми өлештән соң төп басым команда булып эшләү рухын ныгытуга ясалды. Сессияләр һәм фокус-төркемнәр кысаларында катнашучылар актуаль мәсьәләләр турында фикер алыштылар, тәҗрибә уртаклаштылар һәм производство процессларын яхшырту буенча тәкъдимнәрен формалаштырдылар. «Тигез диалог» форматы мастерларга бер-берсен тирәнрәк аңларга, көнүзәк проблемаларны хәл итү юлларын билгеләргә һәм команда бердәмлеге хисен ныгытырга мөмкинлек бирде. Көн бәйрәм табыны артында концерт программасы карау белән тәмамланды.

Бу чаралар осталык, профессионализм һәм команда рухы «Татнефть-Добыча» структур подразделениесенең уңыш нигезе булуын тагын бер кат раслады.

Иң яхшыларның да яхшылары

«Елховнефть» нефть-газ чыгару идарәсенең «Иң яхшы мастеры» исеменә лаек булдылар:

Л. Гыйниятуллин – 4 нче ЦДНГның 1 нче бригадасыннан нефть, газ һәм конденсат чыгару буенча мастер;

А. Попов – 5 нче ЦДНГның 3 нче бригадасыннан нефть, газ һәм конденсат чыгару буенча мастер;

Р. Хәмидуллин – 4 нче ЦДНГның 2 нче бригадасыннан нефть, газ һәм конденсат чыгару буенча мастер;

И. Исхаков – ЦППДның катлам басымын саклау буенча мастеры;

А. Малинов – 1 нче ЦКППНның нефтьне хәзерләү һәм тотрыклыландыру буенча мастеры;

А. Вәлиев – газ цехының газ җыю буенча өлкән мастеры;

Н. Тамшов – ЦПОның җиһазлар ремонтлау буенча мастеры.

«Әлмәтнефть» нефть-газ чыгару идарәсенең «Иң яхшы мастеры» исеменә лаек булдылар:

И. Миннебаев – 2 нче ЦДНГның нефть, газ һәм конденсат чыгару буенча мастеры;

Е. Плешков – 4 нче ЦДНГның нефть, газ һәм конденсат чыгару буенча мастеры;

В. Жигаев – ЦКППНның нефтьне хәзерләү һәм тотрыклыландыру буенча мастеры;

А. Красильников – ЦПОның җиһазлар ремонтлау буенча мастеры.

«Татнефть-Добыча» структур подразделениесендә «Нефть хәзерләү буенча установканың иң яхшы начальнигы» исеменә лаек булдылар:

Н. Зайнетдинов – «Елховнефть» идарәсенең 1 нче ЦКППНыннан установка (нефть хәзерләү) начальнигы;

М. Корюшов – «Әлмәтнефть» идарәсе ЦКППНыннан установка (нефть хәзерләү) начальнигы.

«Татнефть-Добыча» структур подразделениесендә «Иң яхшы мастер» исеменә лаек булдылар:

А. Красильников, Р. Зиннуров – «Әлмәтнефть» идарәсе ЦПОсыннан җиһазлар ремонтлау буенча мастерлар.