60 млн урлау вакыйгасының тулы версиясе: инкассаторның хезмәттәше әлеге көн турында сөйли һәм ул гына да түгел...

Хатынын бала тудыру йортыннан каршы аласы урынга Максим Медовны - инкассатор машинасын йөртүче, аягы яраланган ир-егетне - дүрт операция көтә.

33 яшьлек Максимга өч- дүрт ай дәваланырга туры киләчәк.

- Кәефегез ничек?

- Яхшы, армиядәге кебек. Мин Чечняда хезмәт иттем, хәрби бәрелешләрдә катнаштым.

- Инкассатор хезмәтенә ничек килеп эләктегез?

- Мин салым инспекциясендә машина йөртүче идем. Монда шундый ук вазифага кеше эзләүләрен әйтеп, барып карарга киңәш иттеләр. Гариза яздым, 1 айдан соң чакырдылар. 2008 ел иде.

- Богаченко белән ничек таныштыгыз?

- 2010 елда эшкә урнашты ул. Яхшы гына аралашып киттек, соңгы көнгә кадәр ул үзен уңай яктан гына күрсәтте.

- Аңарда нинди дә булса шикчел билгеләр сизелмәдеме? Үз-үзен тотышында?

- Юк. Безнең бригада зур, шуңа көн дә күрешми идек. Бурычлар төрле: ул - инкассатор, мин - машина йөртүче. Минем хезмәт баскычы буйлап күтәрелергә мөмкинлегем юк, аныкы - бар иде. Миңа күтәрелер өчен югары белем алырга кирәк.

- 23 гыйнвар вакыйгасын ничек тасвирлый аласыз?

- Гадәти эш сменасы иде. Иртән килдек, исәнләштек. Богаченко үзен гадәттәгечә тотты, дулкынланды, борчылды дип әйтә алмыйм. Исәп-хисап-касса үзәгенә килдек, акчаларны алдык һәм маршрут буенча киттек. Бервакыт Богаченко миннән маршрутны үзгәртүне таләп итте. "Әнә бу якка борыл", - диде. Мин ризалашмадым һәм ул атты...

- Ниятенең җитди булуы турында кисәттеме соң?

- Мин аннан: "Игорек, син шаяртасыңмы әллә?" - дип сорадым. Ул: "Юк, шаярмыйм", - диде, шуннан соң атты.

- Сез мондый хәл килеп чыгар дип көтмәгән идегезме?

- Юк. Әгәр иртән миннән: "Богаченко белән разведкага барасыңмы?" - дип сорасалар, мин ышанып җавап биргән булыр идем. Аңа таяна алам дип уйлый идем.

- Сез дуслар идегезме, әллә эш буенча гына аралаштыгызмы?

- Бары тик эш буенча гына.

- Инкассатор машинасы туктагач, Богаченко аткач, ни булды?

- Богаченко безгә машинадан чыгарга кушты, пистолет белән селтәнде. Мин чыктым да, яраланган аягыма бастым, кинәт авырту сизеп, тәгәрмәч астына егылдым. Богаченко аякларым өстеннән чыкмасын өчен хезмәттәшем мине тартып чыгара башлады. Мине чыгару белән Богаченко кузгалып китте. Ә мине 10-15 минуттан шифаханәгә алып киттеләр.

- Хәзер вакыйгага анализ ясаганда аңа каршылык күрсәтергә мөмкин булыр иде дип уйлыйсызмы?

- Әгәр дә аның ниләр кыланасын белгән булсак, каршы тора алган булыр идек. Безгә ул көтелмәгән хәл булды. Көн дә бергә эшләп йөргән кешене шундый юлга барыр дип ничек күзалларга була? Миндә корал бар иде, әмма мин аны кулланырга өлгермәдем, чөнки миндә сызлану шогы иде.

- Богаченко гаиләсе турында сөйли идеме? Аларның аерылышу алдында торганнарын белә идегезме?

- Аерылышу хакында белмәдем. Ул өйләнгәндә эшкә тортлар, җимешләр алып килеп, безне сыйлаганын хәтерлим.

- Ул рәхәт, мул тормышта яшәгән, диләр...

- Алай ук дип әйтмәс идем. Машинасы 300 мең сум тирәсе иде. Чит илгә чыгып керде, әмма отпуск акчасына бу мөмкин дип уйлыйм.

- Күпләр интернетта аны герой дип саный. Сез ничек уйлыйсыз?

- Ул хыянәтче! Аның бу гамәлен мин тагын ничек бәяли алам? Ул мине авыр хәлдә калдырды, "утыртты". Озакламый минем икенче балам туачагын да белә иде.

- Ничек уйлыйсыз, Богаченко өчен бу вакыйга ничек тәмамланачак? Аңа ни әйтер идегез?

- Мин аның барысын да төптән уйлап, тизрәк бирелүен теләр идем. Бәлки шулай эшләсә, ирегеннән чикләү вакытын да киметерләр иде... Тагын мин аның күзләренә карап: "Ни өчен болай эшләдең?" - дип сорар идем.

Әңгәмә "Бизнес-онлайн"нан тәрҗемә ителде