Әлмәттә хатын-кызлар өчен вакантлы эш урыннары ярминкәсе узды

Әлмәтнең "Россия эше" кадрлар үзәгендә хатын-кызлар өчен вакантлы эш урыннары ярминкәсе узды. Чара "Минем карьерам «Бердәм Россия» белән" гарантияле әңгәмә форматында узды.

Ярминкәдә эш урыннарын биш оешма тәкъдим итте:ИК-8, «Мобиль Телесистемалар» ГАҖ, «РАДА» ҖЧҖ,  «Мирас» спорт комплексы, 11 нче мәктәп.

Тәкъдим ителгән вакансияләр арасында җитештерү һәм хезмәт бүлмәләрен җыештыручы, кастелянша, сатучы, рәссам, урам җыештыручы, кече тәрбияче, кухня эшчесе, бухгалтер, пешекче, кассир һ. б. бар.

Ярминкәдә 57 кеше булды, эш бирүчеләр үзләре өчен яраклы дәгъва кылучыларны сайладылар, дип хәбәр итә кадрлар үзәге.