Әлмәттә төзүчеләрне хөрмәтләделәр

«Әлмәт төзүчеләренә дан» мемориалында тантаналы митинг һәм чәчәкләр салу булды.

Тимур Нагуманов алдынгыларга рәхмәт сүзләрен җиткерде: "Без чәчәкләр салабыз һәм нефть башкаласын төзегән кешеләрне искә алабыз. Бу бәйрәм, чын мәгънәсендә, шатлыклы һәм тантаналы. Бу көнне без шулай ук төзүчеләрнең хәзерге буынына рәхмәт әйтәбез. Сезнең ярдәм белән без бик матур шәһәрдә яшибез".

Озак вакытлар «Востокмонтажгаз» ААҖне җитәкләгән тармак ветераны Владимир Бартенев яшь буын төзүчеләргә рәхмәт белдерде: "Данлы традицияләр эстафетасын кабул итеп, нефть төбәге тармагын лаеклы рәвештә үстерүне һәм камилләштерүне дәвам итүчеләргә һәрвакыт уңышлар юлдаш булсын".

Үзенең котлау сүзен дәвам итеп, ул төзелеш тармагы ветераннарын билгеләп үтте.

"Шулай ук бу көнне Әлмәт төзүгә үз тормышларын керткән искиткеч кешеләрне искә алыр идем: Лаврентий Гоголашвили, Шаген Донгарян, Марат Хөснетдинов, Александр Кононов, Владимир Зиновьев, Мөхәммәт Сабиров, ул безнең «Востокмонтажгаз» трестын төзегән һәм мин аның җитәкчелегендә унбер ел эшләдем", – дип белдерде Владимир Васильевич.

Яшьләр үзәгенең актлар залында бәйрәм концертында төзүчеләр, инженерлар, сметачылар, архитекторлар, кранчылар, монтажчылар һәм бетончылар адресына котлау һәм рәхмәт сүзләре яңгырады.

Бәйрәм хөрмәтенә, шулай ук намуслы һәм нәтиҗәле хезмәте, төзелеш комплексын үстерү һәм шәһәр төзелеше өлкәсендәге казанышлары өчен тармак алдынгыларын һәм ветераннарын мактау грамоталары һәм рәхмәт хатлары белән бүләкләделәр.

Фото: Әлмәт муниципаль районы башлыгының матбугат хезмәте