Әлмәт Россиянең 95 зур шәһәре арасында 27 нче урынны алган

Россия төзелеш һәм торак - коммуналь хуҗалык министрлыгы тарафыннан уңайлы мохит булган торак пунктларның рейтингы төзелде. Әлмәт 360 мөмкинлектән 204 балл җыйган.

Шәһәр торак һәм тирә-юнь киңлекләре өчен 48 балл алган; 34  балл урам-юл челтәре өчен; яшелләндерелгән урыннар өчен 25 балл; социаль-ял инфраструктурасы өчен 38 һәм гомумшәһәр киңлеге өчен 38 балл алган.

Республика хөкүмәте һәм “Татнефть” компаниясе ярдәме белән шәһәр даими үзгәрә, урамнарны төзекләндерү, җәмәгать киңлекләрен булдыру проектлары тормышка ашырыла.