Татарстанның атказанган укытучысы Габделвахит Гыйззәтуллин 85 яшьлеген билгеләп үтте

Атказанган укытучы, мәктәп директоры, җәмәгать эшлеклесе һәм философия докторы Габделвахит Гыйззәтуллин 85 яшьлек юбилеен каршы алды. Юбилярны шәһәр хезмәтләре җитәкчеләре, укучылары да котлады.

Әйтик, Роза Әфләтунова кайчандыр аның 11 мәктәптә укучысы булган.

"Габделвахит Мәгъсүм улы шундый энергияле иде. Ул беркайчан да соңга калмады, дәрес һәрвакыт вакытында башлана иде", – дип искә ала Әлмәт районы Советы Аппараты җитәкчесе Роза Әфләтунова.

Казан педагогика институтын тәмамлаган Габделвахит Гыйззәтуллин 1965 елдан Әлмәттә укытучы булып эшли башлый. Ул физика укытучысы булган, информатика укыткан, төрле елларда 5 нче һәм 11 нче мәктәпләрне җитәкләгән.

Муниципаль район Советы исеменнән аңа Мактау грамотасы тапшырылды. Габделвахит Гыйззәтуллин "Татарстан нефтенең 70 еллыгы", "Әлмәтнең 60 еллыгы" медальләре белән бүләкләнде. Юбилярның туган көнендә ветераннар хәрәкәтендә актив катнашканы өчен тагын бер медаль  өстәлде.

1997 елдан ул Икътисад, идарә һәм хокук институтын җитәкли, балалар һәм яшүсмерләр иҗаты үзәгендә эшли. Габделвахит Гыйзәтуллин берничә ел мәгариф идарәсендә эшли. 20 һәм 21 мәктәп төзелешен хуплый, мәктәпкәчә учреждениеләр төзүдә ярдәм итә.

Вазифалар һәм эш өлкәсе алмашынса да, характер үзгәрешсез калган. Үзенең 85 яшендә Габделвахит Гыйззәтуллин сүз һәм эш кешесе булып кала. Котлаучыларның һәркайсы үзенең аның белән танышу һәм аның белән эшләү тарихы белән уртаклашырга ашыга. Юбилярны иҗади номерлар белән дә котладылар.