Тагын бер әлмәтле мошенниклар тозагына эләккән

Әлмәттә каракларның тозагына кар частарта торган җайланма сатып алырга теләгән 42 яшьлек ир эләккән. Ул җинаятьчегә 25130 сум күләмендә акча күчергән. Бу хакта Россия эчке эшләр министрлыгының Әлмәт районы буенча матбугат хезмәте хәбәр итә.

Зыян күрүченең сүзләренә караганда, авто-мототехникалы сайтларның берсендә ул кар чистарту машинасын сату турында белдерү күргән. Ир сатучы белән элемтәгә кереп, сатып алу турында килешә һәм 25130 сум акча күчерә. Әмма товар билгеләнгән көнне килми.

Аннары гариза бирүче ялган сатучы белән элемтәгә керергә тырыша, әмма аның бу нияте барып чыкмый. Ә игълан урнаштырылган сайт башка компаниянең игезәк сайты булып чыга. Ул мошенникларның чираттагы корбаны булуын аңлап, полициягә мөрәҗәгать итә.

Хәзерге вакытта полиция хезмәткәрләре  ачыклауга һәм тоткарлауга юнәлдерелгән оператив-эзләү чаралары комплексын үткәрә.