Әлмәт районы башлыгы яшь экоактивист белән очрашты

Кулланылган батарейкалар өчен боксларга охшаш рәвештә, кибет һәм мәктәпләрдә пластик капкачлар өчен аерым контейнерлар урнаштырырга, ә чүп эшкәртү чараларын хәйрия фондларына юнәлтергә кирәк-яшь экологияне саклаучының идеясы әнә шундый.

Тимур Нагуманов инициативаны хуплады һәм Альбертны әнисе белән проект турында фикер алышу өчен башкарма комитетка чакырды.

Әңгәмәдә  башкарма комитет җитәкчесе Айнур Исхаков, мәгариф идарәсе башлыгы Ирина Павловская һәм «экология һәм төзекләндерү департаменты» директоры Илдар Нәбиуллин актив катнаштылар. Алар пластик калдыкларны кабат куллану өчен утильләштерү һәм эшкәртү үзенчәлекләре турында сөйләштеләр. Оештыру моментлары, булачак контейнерлар дизайны турында фикер алыштылар, үз фикерләре белән уртаклаштылар.

Район башлыгы билгеләп үткәнчә, кече яшьтән үк көнкүреш чүп-чарын аңлы бүлү культурасын үстерү мөһим. "Барысын да балалардан башларга кирәк, чөнки балалар хәзерге вакытта аңлырак", – диде Тимур Дмитриевич.

Яшь активист  үзенең мавыгулары һәм киләчәккә планнары турында сөйләде. Кече сыйныф укучысы пластикны аерым җыю бәйгесендә призер булып тора. Аның төрле юнәлештәге бик күп проектлары бар, алар белән ул призлы урыннар алган. Малай шигырьләр укырга, психологияне өйрәнергә һәм экология темасына әкиятләр язарга ярата.

"Альберт һәрчак мәктәптә агитаторлык эшчәнлеге белән шөгыльләнде, экологик повестка темасына сыйныф сәгатьләренең инициаторы булды һәм хәтта урамда кулдан ясалган белешмәлекләр дә таратты", – дип сөйләде укучының  әнисе.

Нәтиҗәле әңгәмәдән соң Тимур Нагуманов җаваплы затларга күрсәтмәләр бирде һәм кечкенә киңәшчегә истәлекле сувенирлар тапшырды.

Фото: Әлмәт муниципаль районы башлыгының матбугат хезмәте