7 меңнән артык әлмәтле гомумшәһәр өмәсендә катнашты
Шәһәрдә өмәләр 31 майга кадәр дәвам итәчәк.
Ел саен язын, экологик икеайлык кысаларында, шәһәр һәм район территорияләрен санитар чистарту, төзекләндерү һәм яшелләндерү буенча өмәләр үткәрү матур традициягә әйләнде. Иң мөһиме-алар массакүләм рәвештә һәм кызыксыну белән уза.
Яңгыр сибәләп торса да, бүген Әлмәт муниципаль районында беренче гомумшәһәр санитар-экологик өмә узды. Анда 7030 кеше катнашты. Массакүләм эш барышында каты көнкүреш калдыклары полигонына 2000 кубометрдан артык чүп-чар кабул ителде.
Үзбушаткычлар һәм төягечләр эшкә җәлеп ителде, чүп-чар җыю һәм чыгару эше оештырылды, юл буйлары тәртипкә китерелде, чүп үләннәре бетерелде.
Май бәйрәмнәре алдыннан барлык муниципаль учреждениеләрнең хезмәт коллективлары, волонтерлар, шәһәрнең территориаль иҗтимагый үзидарәләре, мәктәп укучылары , идарәче компанияләр, эшмәкәрләр һәм предприятиеләр һәм актив гражданнар урамнарны, ишегалларын, мемориаль комплексларны, истәлекле урыннарны, уен, спорт һәм балалар мәйданчыкларын тәртипкә китерәләр, кыш буена җыелган чүп-чарны җыештыралар.
Следите за самым важным и интересным в Telegram-каналеТатмедиа