Яңа елда әлмәтлеләр “Халык контроле”нә 16 хәбәр юллаган
Аеруча аларны юллар торышы, боз сөңгеләре, кайбер ишегалларында яктырткычлар юклыгы, машиналарын тиешсез урында калдыручылар борчый.
Шулай ук бәйрәм чорында сәүдә нокталарында сыйфатсыз, саклану вакыты чыккан азык-төлеккә юлыкканнар да шикаятьләрен калдырган.
Шуларның берсе - үзен Л. дип кенә куйган әлмәтле кичәге түгел, ә иртәгәге көнге күмәчкә юлыгуын бәян иткән.
"Киләчәк икмәге" искерми
- 3 гыйнвар көнне Тукай проспектындагы икмәк кибетеннән 4.01.2014 датасы куелган күмәч сатып алдым (саттылар). Биредә эшләүчеләр аек иде, мөгаен, фасовкалаучылар игътибарсыздыр. Бу гамәл махсус эшләнмәгәндер дип уйлыйм.
Әлеге язманы укыгач, бер мәзәк хәтергә килде. Ире кичен эштән кайткач, тормыш иптәшеннән:
- Бу аш кичәгеме? - дип сорый.
Хатын аптырап калмый.
- Кичәге генә түгел, ул әле иртәгәге дә, - дип җавап бирә.
Ипи пешерүчеләрнең "өлгерлегенә" үземнең дә юлыкканым бар. Дөресрәге, иртәгәге көнге икмәкне кибеттән әти сатып алып кайткан иде. Шул чакта ук: "Ай-һай, оста эшлиләр дә, керемне югалтырга теләмәүче сәүдәгәрләр юлларын табып кына тора", - дип шаккаткан идем. Ә бәлки датаны ялгыш куйганнардыр дип шикләнгәнем дә истә. Хәзер инде соңгы уемнан кире кайттым. Баксаң, "яңа пешкән, кайнар" ипи сатып алучылар арабызда бар икән. Шикаятьне хуплап (алар саны 41 гә җиткән), Диләрә исемле шәһәрдәшебез болай дип язган:
- "Пятерочка"да кичен һәрвакыт иртәгәге көнге ипиләрне сатуга куялар, мин күп тапкырлар моңа юлыктым.
Яңа ел чорында мондый буталчыклыклар булырга мөмкинлегенә ишарәләп булса кирәк, Ольга:
- Хәтеремдә, 2009 елның 31 декабрендә мин ерак киләчәктән үк күмәч сатып алдым - 2019 елныкын, - дип яза. Бу очракның ялгышу аркасында килеп чыкканлыгы ярылып ята, әлбәттә.
Ринат белән Вячеслав Әлмәттә иртәгәге ипинең яңалык булмавын раслап:
- Гадәти хәл, аның каравы "киләчәк икмәге" искермәгән була әле, - дип шаярта.
- Тиз бозылучан продукт җитештерүче бик күпләр шулай эшли. Ипи белән дә шулай, аптырарга кирәкми, - дип үз фикерен калдырган Алена да.
Шулаен шулайдыр да ул. Ләкин бит халыкны күз алдында ук алдыйлар. Бу уңайдан нинди дә булса аңлатма алу теләге белән "Әлмәт икмәк заводы"ның телефон номерын җыйдым. Әмма сөйләшү бик кыска булды.
- Бу уңайдан әлегә бер сүз дә әйтә алмыйм, тикшерергә кирәк, - дип кенә җавап кайтарды коммерция бүлеге хезмәткәре һәм күмәчнең кайсы кибеттә сатылганын тагын бер тапкыр ачыклады. Тикшерү башланды, димәк.
Йокы качты
Рөстәм С. гаиләсе белән төн җиткәнен пошамаганга калып көтеп тора икән. Ник дисәң, алар яшәгән Гафиятуллин урамындагы 14 нче йортта спутник антеннасы чыбыгының җил белән шак та шок стенага бәрелүе йокларга ирек бирми.
- "Эталон" кибете өстендәге спутник антенналарының закон буенча куелганмы-юкмы икәнлеген ачыклауларын сорыйм. Әгәр дә шартлар үтәлгән булса, чыбыкларны беркетүләрен мәҗбүр итәргә кирәк. Стенага бәрелүеннән балалар курка, үзебез дә иза чигәбез.
- Бәлки ул өзелгәндер, - дип аңа мөрәҗәгать иткән Гражданинга ул болай дип җаваплый:
- Үзем чыгып карадым, кабель өзек түгел. Безнең йортның пенопласт белән тышланганын исәпкә алсак, анда калган бушлык нәтиҗәсендә тавыш көчле чыга. 9 айлык балабыз бар, безнең хәлне аңлыйсыздыр.
Рөстәмнең хәбәрен 15 кеше хуплаган. Әлеге мәсьәләнең хәл ителәчәгенә шик юк, әлбәттә, чыбыкны беркетеп кую зур чыгымнар сорамый, бары тик җитезлек һәм эшкә җаваплы карау гына кирәк. Шулай да без Рөстәмнең гаиләсенә тынычлык кайтаруны тизләтү өчен җаваплы службаларга мөрәҗәгать итәчәкбез. Бу хакта газетабызның алдагы саннарында хәбәр итәрбез.
"Халык контроле"нә күзәтүне Гөлназ ГЫЙЗЗӘТУЛЛИНА ясады
Следите за самым важным и интересным в Telegram-каналеТатмедиа