«Нефтьче» хоккей командасы

Тасвирлама:
«Нефтьче» хоккей клубы — югары хоккей лигасында уйнаучы Әлмәттән алкалы хоккей командасы.
Сайт:
https://ahc-neftyanik.ru

Әлмәттә алкалы хоккей буенча беренче команданы (һәвәскәрләр командасын) 1964 елда спорт энтузиастлары, ул вакыттагы туплы хоккей командасы уенчылары оештыра, алар «Труд» республика беренчелегендә катнаша. Бу коллектив Татарстанның якындагы шәһәрләре хоккейчылары белән берничә иптәшләрчә матч үткәрергә өлгерә. «Спутник» (1965-1986) 1965 елда ТАССР җитәкчелеге дәрәҗәсендә, яшь һәм тиз үсеп килүче нефтьчеләр шәһәрендә яшәүчеләрнең ялын уздыру өчен өстәмә мөмкинлекләр булдыру максатыннан, Әлмәттә осталар командасы булдыру турында карар кабул ителә. Моның өчен Казаннан Әлмәткә уенчы тренер Александр Пономарев килә. Яңа команданың беренче җыелышы 1965 елның ноябрендә була. Анда аны «Спутник» дип атарга карар кылалар. Космос темасы ул елларда бик популяр була. Команданың беренче составына Казаннан һәм Горькийдан чакырылган хоккейчылар, шулай ук берничә җирле уенчы кергән. Хоккейчыларны үз карамагына Миңлебай газ-бензин заводын алган. «Спутник» шунда ук ТАССР чемпионатына эләгә һәм 16 декабрьдә Казанда үзе өчен тарихи беренче рәсми матч үткәрә, анда җирле «Рубин»га 4-7 исәбе белән оттыра. Бу җиңелүгә карамастан, әлмәтлеләр нәтиҗәдә республика чемпионнары булалар һәм Кузнецк шәһәрендә РСФСР чемпионатының зона турнирында уйнау хокукы алалар. «Спутник» анда җиде катнашучы арасында 5 нче урынны ала, ләкин җәмәгатьчелек, шәһәр һәм республика җитәкчеләре үтенече буенча «Б» классы буенча Союз беренчелегендә катнашучылар санына кертелде. СССР беренчелегендә дебют 1966-1967 елгы сезонда «Спутник» үз зонасында ун команда арасында 8 нче урынны ала, ә инде киләсе сезонда икенче була һәм «А» классына эләгү мөмкинлеге ала, анда башка зоналардан иң яхшы командалар очраша. Әмма, мондый беренче омтылыш (1975 һәм 1977 еллардагы ике омтылыш кебек үк) уңышсыз булып чыга. «Спутник» «Б» классында барлыгы 13 сезон үткәрә, һәм бары тик 1979 елда гына, ниһаять, «А» классына керә ала, башта үз зонасында җиңеп, аннары Әлмәт бозында барлык матчларны ота. Бу уңыш РСФСР чемпионнары исемен дә алып килә. 1999 елда «Татнефть» генераль директоры Шәфәгать Фәхраз улы Тәхаутдинов инициативасы белән Татарстанның бу төбәгендә профессиональ һәм массакүләм хоккейны үстерү программасы кабул ителде. Мондый вакыйга балалар ишегалды хоккеен торгызуга яңа көчле этәргеч бирде. Кыска вакыт эчендә нефтьчеләр акчасына шәһәрдә, ә аннары бөтен көньяк-көнчыгышта 70тән артык ишегалды корты төзелде яки төзекләндерелде, Бөгелмә, Азнакай, Җәлил, Алабуга, Мамадыш, Актаныш, Зәй, Баулыда боз сарайлары сафка бастырылды, тагын берсе Әлмәттәге балалар-яшүсмерләр спорт мәктәбе өчен ясалды. Тренерлык штатлары бүлеп бирелә, ел саен форма, кәшәкәләр, кирәкле амуниция сатып алына. Меңләгән балаларга яраткан спорт төре белән шөгыльләнергә, характерларын чыныктырырга, урамның начар йогынтысыннан аерылырга мөмкинлек бирелде. Даими рәвештә «Алтын алка» клубы призына хоккей буенча иң массакүләм ярышлар, ә сезон дәвамында иганәчеләр призына ярышлар үткәрелә. Ноябрьдән март аена кадәр «Татнефть» ААҖ кубогына турнир аеруча популяр булды. Үзенең 40 еллыгын менә ун елдан артык югары лигада иң көчлеләрнең берсе булган «Нефтьче» осталары командасы да билгеләп үтте. 2003 елдан аның тренерлык күперенә яшь остазы Р.Гыймаев баса, ул эстафетаны А.Пономарев, Д.Судоплатов, В. Счус, н. Шугин, А. Ковалевский, А. Долганов, В. Кузнецов, В. Куплинов, н. Мышагин, В. Белоусовтан кабул итә. Тренерлар күперендә Ришат Гыймаевны Юрий Мордвинцев, Илнур Гыйззәтуллин алмаштырды. 2022 елдан команданы Эдуард Дмитриев җитәкләде. Фото: "Нефтьче" хоккей клубы